ہری پور پولیس نے بین الصوبائی چور اور ڈکیت گروہ کا سرغنہ گرفتار کر لیا

ہری پور پولیس نے بین الصوبائی چور اور ڈکیت گروہ کے سرغنہ ملزم محمد اکبر کو کامیابی سے گرفتار کر لیا۔ یہ کارروائی تھانہ سرائے صالح کے ایس ایچ او صدیق شاہ کی قیادت میں ڈی ایس پی سٹی کی نگرانی میں انجام دی گئی۔ ملزم پر پولیس مقابلے کے دوران اپنے ساتھی عبدالاحمد کو گولی مار کر ہلاک کرنے کا الزام ہے، جس کے بعد وہ فرار ہو گیا تھا۔ گرفتاری کے دوران ملزم سے ایک پستول بھی برآمد کیا گیا ہے۔

واقعہ 8 فروری 2025 کو پیش آیا جب پولیس کو مخبر کی اطلاع پر ناکہ بندی کی گئی۔ ملزمان نے گرفتاری سے بچنے کے لیے پولیس پر فائرنگ کی، جس کے نتیجے میں ایک ملزم ہلاک ہو گیا جبکہ دوسرا فرار ہو گیا۔ پولیس نے مقدمہ درج کرتے ہوئے ملزم کے خلاف کارروائی جاری رکھی اور بالآخر اسے گرفتار کر لیا۔ تفتیش کے دوران مزید سنسنی خیز انکشافات کی توقع ہے۔

ڈی پی او ہری پور فرحان خان نے پولیس کی کارکردگی کو سراہتے ہوئے کہا کہ جرائم پیشہ عناصر کے خلاف کارروائیاں جاری رہیں گی۔ عوام سے تعاون کی اپیل کرتے ہوئے کہا گیا کہ وہ کسی بھی مشکوک سرگرمی کی فوری اطلاع دیں۔

یہ بھی پڑھیں: ہری پور حوالہ ہنڈی اور انسانی سمگلنگ میں ملوث اشتہاری سمیت 2 ملزمان گرفتار