پشاور میں انسانی اعضا کی غیر قانونی تجارت میں ملوث گروہ گرفتار
یہ گروہ مجبور افراد کو نشانہ بنا کر ان کے گردے نکالنے اور بیچنے کے مکروہ دھندے میں ملوث تھا
تحریر: عمران ٹکر
پشاور کی ایکسائز پولیس نے ایم ون جوائنٹ چیک پوسٹ پر کارروائی کرتے ہوئے انسانی اعضا کی غیر قانونی خرید و فروخت میں ملوث گروہ کو گرفتار کر لیا۔
ملزمان دو لاکھ اسی ہزار روپے کے عوض گردے فروخت کرنے جا رہے تھے۔ پولیس کے مطابق گروہ کا سرغنہ شہزاد علی، ملتان سے محسن اور راشد کو پشاور لایا تھا، جہاں ان کے گردے فروخت کرنے کا معاہدہ طے پایا تھا۔
یہ گروہ مجبور افراد کو نشانہ بنا کر ان کے گردے نکالنے اور بیچنے کے مکروہ دھندے میں ملوث تھا۔تفتیش کے دوران، ملزم شہزاد علی کے موبائل سے بے شمار متاثرہ افراد کی ویڈیوز بھی برآمد ہوئی ہیں، جو اس غیر قانونی کاروبار میں گروہ کی گھناؤنی سرگرمیوں کا واضح ثبوت فراہم کرتی ہیں۔
ملزمان کو مزید تفتیش کے لیے ایف آئی اے کے حوالے کر دیا گیا ہے تاکہ ان کے نیٹ ورک اور دیگر ممکنہ ساتھیوں کا سراغ لگایا جا سکے۔ پولیس حکام نے یقین دہانی کرائی ہے کہ انسانی اعضا کی غیر قانونی تجارت میں ملوث عناصر کے خلاف سخت قانونی کارروائی کی جائے گی۔
یہ بھی پڑھیں: بٹگرام میں ٹرانسفارمر چوری کرنے والا گروہ گرفتار
