خیبرپختونخوا میں پچھلے 24 گھنٹوں میں بارشوں اور سیلاب کے باعث 5 افراد جاں بحق
بونیر، ملاکنڈ اور مانسہرہ میں گھر تباہ، امدادی کارروائیاں جاری — مزید بارشوں کا انتباہ
پی ڈی ایم اے کی جانب سے جاری کردہ رپورٹ کے مطابق، صوبہ خیبرپختونخوا میں پچھلے 24 گھنٹوں کے دوران تیز بارشوں اور فلش فلڈ کے باعث مختلف حادثات پیش آئے ہیں، جن میں 5 افراد جاں بحق ہو گئے جبکہ ایک زخمی ہوا ہے۔ جاں بحق ہونے والوں میں ایک مرد، دو خواتین اور دو بچے شامل ہیں، جبکہ زخمیوں میں ایک بچہ شامل ہے۔
رپورٹ کے مطابق، بارشوں اور فلش فلڈ کے باعث ایک گھر مکمل طور پر منہدم ہو گیا ہے۔ یہ حادثات صوبے کے مختلف اضلاع بونیر، ملاکنڈ اور مانسہرہ میں پیش آئے ہیں۔
پی ڈی ایم اے نے متعلقہ ضلعی انتظامیہ کو ہدایت کی ہے کہ وہ متاثرہ خاندانوں کو فوری امداد فراہم کریں اور زخمیوں کو بہترین طبی سہولیات مہیا کریں۔
پی ڈی ایم اے کے مطابق، بارشوں کا سلسلہ 11 جولائی تک جاری رہنے کا امکان ہے۔ ادارے نے ضلعی انتظامیہ کو پہلے ہی الرٹ جاری کر دیا ہے اور پیشگی اقدامات اٹھانے کی ہدایت کی ہے۔
پی ڈی ایم اے تمام ضلعی انتظامیہ، متعلقہ محکموں اور امدادی اداروں کے ساتھ مسلسل رابطے میں ہے۔ ادارے کا ایمرجنسی اپریشن سنٹر مکمل طور پر فعال ہے، اور عوام سے درخواست ہے کہ کسی بھی ناخوشگوار واقعے کی اطلاع 1700 پر دیں۔
