پاکستان میں عید الفطر کل پیر 31 مارچ 2025 کو منائی جائے گی کیونکہ یکم شوال 1446 ہجری کا چاند ملک کے مختلف علاقوں میں نظر آ گیا ہے۔ مرکزی رویت ہلال کمیٹی کے چیئرمین مولانا عبدالخبیر آزاد نے اتوار کو اسلام آباد میں پریس کانفرنس کرتے ہوئے اس کی تصدیق کی۔
مولانا عبدالخبیر آزاد نے میڈیا کو بتایا کہ لاہور، اسلام آباد اور فیصل آباد سمیت متعدد مقامات سے چاند دیکھے جانے کی قابل اعتماد گواہیاں موصول ہوئی ہیں۔ انہوں نے کہا کہ "شوال کا چاند نظر آ گیا ہے اور ملک بھر میں کل عید الفطر منائی جائے گی”۔
رویت ہلال کمیٹی کا اجلاس اسلام آباد میں منعقد ہوا جس میں وزارت مذہبی امور، محکمہ موسمیات، وزارت سائنس اینڈ ٹیکنالوجی اور سپارکو کے نمائندوں نے بھی شرکت کی اور تکنیکی معاونت فراہم کی۔ رپورٹس کے مطابق اسلام آباد اور گردونواح میں آسمان صاف تھا جس کی وجہ سے چاند کو دیکھنا آسان ہوا۔
لاہور میں مغرب کی اذان کے فوراً بعد چاند نظر آنے کی اطلاعات موصول ہوئیں۔ محکمہ موسمیات نے پہلے ہی پیش گوئی کی تھی کہ کراچی سمیت ملک کے بیشتر حصوں میں صاف موسم ہوگا جس سے چاند نظر آنے کے امکانات بڑھ گئے تھے۔ سپارکو کے مطابق شوال کا نیا چاند 29 مارچ کو پاکستانی وقت کے مطابق شام 3:58 بجے تشکیل پایا تھا اور 30 مارچ کو غروب آفتاب تک چاند کی عمر تقریباً 27 گھنٹے ہو چکی تھی جو کہ پورے پاکستان میں اسے دیکھنے کے لیے کافی تھی۔
اس کے ساتھ ہی کراچی، لاہور، پشاور اور کوئٹہ میں زونل رویت ہلال کمیٹیوں کے اجلاس بھی منعقد ہوئے جہاں گواہیوں کی تصدیق کی گئی۔ چاند نظر آنے کی سرکاری تصدیق کے بعد ملک بھر میں عید الفطر کی تیاریاں تیزی سے جاری ہیں اور خاندان اپنے عزیزوں کے ساتھ خوشیوں بھری عید منانے کے لیے تیار ہیں۔ حکومت پہلے ہی پانچ اور چھ روزہ ہفتہ رکھنے والے دفاتر کے لیے بالترتیب تین اور چار دن کی چھٹیوں کا اعلان کر چکی ہے۔
واضح رہے کہ سعودی عرب اور متحدہ عرب امارات نے 29 مارچ کو ہی شوال کا چاند دیکھ لیا تھا جس کے بعد ان ممالک میں 30 مارچ کو عید الفطر منائی گئی۔ اسی طرح کویت، قطر اور ایران سمیت دیگر خلیجی ممالک میں بھی اتوار کو عید کا اعلان کیا گیا۔ تاہم عمان، بنگلہ دیش، بھارت، انڈونیشیا، ملائیشیا، برونائی اور آسٹریلیا جیسے ممالک میں 29 مارچ کی شام کو چاند نظر نہیں آیا، جس کی وجہ سے وہاں 31 مارچ کو عید الفطر منائی جائے گی۔ مثال کے طور پر بنگلہ دیش کی قومی رویت ہلال کمیٹی نے تصدیق کی کہ چاند نظر نہیں آیا اور 30 مارچ کو رمضان المبارک کا آخری دن ہوگا۔
یہ بھی پڑھیں: حکومت نے عید سے قبل پیٹرول کی قیمت میں 1 روپیہ فی لیٹر کمی کر دی
