محکمہ موسمیات کی ملک بھر میں شدید بارشوں اور ژالہ باری کی پیش گوئی

محکمہ موسمیات نے پیش گوئی کی ہے کہ 25 سے 27 مارچ کے دوران ملک کے مختلف علاقوں میں شدید موسمی صورتحال دیکھنے کو مل سکتی ہے۔ پنجاب، خیبر پختونخوا، بلوچستان اور کشمیر میں گرج چمک کے ساتھ تیز بارشوں، ژالہ باری اور آندھی کا امکان ہے، جس کے باعث شہریوں کو محتاط رہنے کی ہدایت کی گئی ہے۔

محکمہ موسمیات کے مطابق مغربی ہوا کا نیا سلسلہ 24 مارچ کی رات پاکستان میں داخل ہوگا اور 27 مارچ تک اثرانداز رہے گا۔ اس دوران پہاڑی علاقوں میں لینڈ سلائیڈنگ اور نشیبی علاقوں میں اربن فلڈنگ کا خدشہ ہے۔ بالخصوص لاہور، راولپنڈی، اسلام آباد، پشاور، کوئٹہ اور ملتان میں شدید بارشیں متوقع ہیں، جبکہ شمالی علاقوں میں برفباری کا بھی امکان ہے۔

انتظامیہ اور متعلقہ اداروں کو الرٹ رہنے کی ہدایات جاری کردی گئی ہیں، جبکہ کسانوں کو بھی اپنی فصلوں کو نقصان سے بچانے کے لیے احتیاطی تدابیر اپنانے کی تاکید کی گئی ہے۔ شہریوں سے گزارش کی گئی ہے کہ غیر ضروری سفر سے گریز کریں اور کسی بھی ہنگامی صورتحال میں متعلقہ اداروں سے رابطہ کریں۔

یہ بھی پڑھیں: خیبرپختونخواہ میں برف باری پنجاب کے لوگوں کے لیے دلچسپی کا باعث ہے