اہم خبریںخیبر پختونخوا
عید الفطر کے موقع پر خیبرپختونخوا میں جامع انتظامات کا اعلان
سیکیورٹی، ٹریفک، صفائی اور سیاحتی مقامات کے لیے خصوصی ہدایات جاری، وزیر اعلیٰ نے تمام محکموں کو الرٹ رکھنے کی ہدایت
عید الفطر کے انتظامات کے حوالے سے وزیر اعلیٰ خیبرپختونخوا کے تمام متعلقہ محکموں کو ضروری احکامات!
وزیر اعلیٰ خیبرپختونخوا علی امین گنڈاپور نے عید الفطر کے لیے مؤثر انتظامات یقینی بنانے کے لیے تمام متعلقہ حکام کو ہدایات جاری کر دی ہیں۔ اس سلسلے میں وزیر اعلیٰ سیکرٹریٹ کی جانب سے انتظامی سیکرٹریوں، ڈویژنل کمشنرز، ڈپٹی کمشنرز، پولیس اور دیگر متعلقہ اداروں کو بیس نکات پر مشتمل مراسلہ جاری کیا گیا ہے، جس میں درج ذیل اقدامات کی ہدایت دی گئی ہے:
سیکیورٹی و قانون نافذ کرنے کے اقدامات
- تمام ڈپٹی کمشنرز اپنے اضلاع میں متعلقہ اداروں کے ساتھ اجلاس منعقد کرکے عیدگاہوں، مساجد اور امام بارگاہوں میں نمازِ عید کے اجتماعات کے لیے جامع سیکیورٹی پلان مرتب کریں۔
- کسی بھی ایڈمنسٹریٹو افسر کے ڈیوٹی اسٹیشن چھوڑنے سے قبل متعلقہ اعلیٰ حکام سے پیشگی اجازت لینا ضروری ہوگا۔
- چاند رات کے موقع پر ہوائی فائرنگ اور آتش بازی پر مکمل پابندی ہوگی، خلاف ورزی کرنے والوں کے خلاف سخت کارروائی عمل میں لائی جائے گی۔
ٹریفک اور ٹرانسپورٹ کے انتظامات
- پبلک ٹرانسپورٹ کے کرایوں کی کڑی نگرانی کی جائے اور زائد کرایہ وصول کرنے والوں کے خلاف کارروائی کی جائے۔
- ون وہیلنگ، تیز رفتاری اور بغیر ہیلمٹ موٹر سائیکل چلانے پر مکمل پابندی عائد ہوگی، جس کے لیے ٹریفک پولیس کے خصوصی دستے تعینات کیے جائیں گے۔
- سیاحتی مقامات اور ان تک جانے والی سڑکوں پر ٹریفک کے بہتر انتظامات کیے جائیں، جہاں ضرورت ہو وہاں ٹورازم پولیس اور سول ڈیفنس کے اہلکار تعینات کیے جائیں۔
صفائی و خواتین کی سہولت کے اقدامات
- عوامی مقامات، بازاروں اور عیدگاہوں میں خصوصی صفائی مہم چلائی جائے۔
- خواتین کے رش والے بازاروں میں فیمیل پولیس اہلکاروں کی تعیناتی یقینی بنائی جائے۔
سیاحوں اور تفریحی مقامات کے لیے اقدامات
- تیز بہاؤ والے دریاؤں میں نہانے پر مکمل پابندی ہوگی، کشتی رانی کے لیے لائف جیکٹ لازمی ہوگی، اور کشتیوں میں گنجائش سے زائد سواریاں لینے کی اجازت نہیں ہوگی۔
- کسی بھی ہنگامی صورتحال سے نمٹنے کے لیے دریاؤں، تفریحی مقامات اور رش والے علاقوں میں ریسکیو 1122 کو الرٹ رکھا جائے۔
- تمام سڑکوں کو ہر وقت کھلا رکھنے کے لیے محکمہ مواصلات اور اربن ڈیولپمنٹ اتھارٹیز کو الرٹ رکھا جائے، اور ضروری مشینری کی دستیابی یقینی بنائی جائے۔
- سیاحوں کی سہولت کے لیے ٹورسٹ فیسیلیٹیشن سینٹرز اور ہیلپ لائنز 24 گھنٹے فعال رکھی جائیں۔
- تفریحی پارکوں میں جھولوں کی اوورلوڈنگ سے اجتناب کیا جائے، اور تمام کیبل کار آپریٹرز سے فٹنس سرٹیفکیٹ لینا لازمی ہوگا۔
صحت عامہ اور ایمرجنسی خدمات
- صوبے بھر کے تمام طبی مراکز کو 24 گھنٹے کھلا رکھا جائے، اور ضروری ادویات و عملہ دستیاب رکھا جائے۔
- پیٹرول پمپس پر پیٹرولیم مصنوعات کی دستیابی یقینی بنانے کے لیے خصوصی اقدامات کیے جائیں۔
سماجی خدمات اور فلاحی اقدامات
- نمازِ عید کے اجتماعات اور میلوں کے مقامات پر صفائی اور ٹریفک پلان کو بروقت ترتیب دیا جائے۔
- تمام ڈپٹی کمشنرز عید کی چھٹیوں کے دوران جیلوں، اسپتالوں اور یتیم خانوں کا دورہ کریں۔
- عوام کی سہولت کے لیے تمام ڈپٹی کمشنرز کے دفاتر میں 24 گھنٹے فعال کنٹرول رومز قائم کیے جائیں، اور ان کے رابطہ نمبرز مشتہر کیے جائیں۔
یہ بھی پڑھیں: تینوں کمپنیوں کے محنت کشوں کو عیدالفطر کی موقع پر بونس دیا جاۓ۔نورالامین حیدرزئی
