خیبرپختونخوا کے بیشتر اضلاع میں 20 اپریل تک بارشوں کا امکان
حساس علاقوں میں سیاحوں اور مقامی آبادی کو احتیاطی تدابیر اپنانے کی ہدایت، ہنگامی صورتحال میں 1700 پر رابطہ کریں
خیبرپختونخوا کے بیشتر اضلاع میں کل شام سے گرج چمک کے ساتھ وقفے وقفے سے بارشوں کا سلسلہ شروع ہونے کا امکان ہے۔ محکمہ موسمیات کے مطابق یہ بارشیں 20 اپریل تک جاری رہ سکتی ہیں۔
پی ڈی ایم اے کے مطابق چترال، دیر، سوات، کوہستان، شانگلہ، بٹگرام، مانسہرہ، ایبٹ آباد، ہری پور، مالاکنڈ، بونیر، باجوڑ، مہمند، خیبر، اورکزئی، کرم، وزیرستان سمیت پشاور، چارسدہ، نوشہرہ، صوابی، بنوں، کرک اور کوہاٹ میں بارشوں کا امکان ہے۔
محکمہ نے تمام ضلعی انتظامیہ کو ہدایات جاری کی ہیں کہ وہ ممکنہ ناخوشگوار واقعات سے نمٹنے کے لیے پیشگی اقدامات کریں۔ ضلعی انتظامیہ کو چھوٹی بڑی مشینری کی دستیابی یقینی بنانے کی ہدایت کی گئی ہے۔
عوام کو ہدایت کی گئی ہے کہ وہ بارشوں کے دوران بجلی کی تاروں، بوسیدہ عمارتوں، سائن بورڈز اور بل بورڈز سے دور رہیں۔ کسانوں کو مشورہ دیا گیا ہے کہ وہ موسمی پیشگوئی کو مدنظر رکھتے ہوئے اپنے کاموں کی منصوبہ بندی کریں۔
حساس بالائی علاقوں میں سیاحوں اور مقامی آبادی کو موسمی حالات سے باخبر رہنے اور احتیاطی تدابیر اپنانے کی ہدایت کی گئی ہے۔ ضلعی انتظامیہ کو ہدایت ہے کہ وہ مقامی زبانوں میں عوام تک معلومات پہنچائیں۔
ہنگامی صورتحال میں تمام متعلقہ اداروں کو روڈ لنکس کی بحالی کے لیے چوکس رہنے کی ہدایت کی گئی ہے۔ سڑک بند ہونے کی صورت میں متبادل راستے فراہم کرنے کی تاکید کی گئی ہے۔ سیاحوں کو مشورہ دیا گیا ہے کہ وہ سیاحتی مقامات کا رخ کرنے سے پہلے پی ڈی ایم اے کی ہیلپ لائن سے رابطہ کریں۔
پی ڈی ایم اے کا ایمرجنسی آپریشن سنٹر مکمل طور پر فعال ہے اور عوام کسی بھی ناخوشگوار واقعے کی اطلاع فری ہیلپ لائن 1700 پر دے سکتے ہیں۔
یہ بھی پڑھیں: محکمہ موسمیات کی ملک بھر میں شدید بارشوں اور ژالہ باری کی پیش گوئی
