خیبرپختونخوا میں مزید طوفانی بارشوں کا امکان
حالیہ صورتحال کے پیش نظر 20 جولائی سے 25 جولائی تک وقفے وقفے سے جاری رہنے کا امکان ہے
صوبائی ڈیزاسٹر مینجمنٹ اتھارٹی (پی ڈی ایم اے) خیبرپختونخوا نے مون سون کی حالیہ صورتحال کے پیش نظر صوبے کے بیشتر اضلاع میں شدید بارشوں کے نئے سلسلے سے متعلق موسمی انتباہ جاری کر دیا ہے۔ محکمہ موسمیات اور متعلقہ اداروں سے حاصل کردہ معلومات کی روشنی میں یہ سلسلہ 20 جولائی سے 25 جولائی تک وقفے وقفے سے جاری رہنے کا امکان ہے۔ پی ڈی ایم اے کے مطابق اس دوران دیر، سوات، چترال، کوہستان، مالاکنڈ، شانگلہ، بٹگرام، بونیر، کوہاٹ، کرک، بنوں، ٹانک، لکی مروت، ڈی آئی خان، باجوڑ، مہمند، خیبر، وزیرستان، اورکزئی، مانسہرہ، ایبٹ آباد، ہری پور، پشاور، چارسدہ، نوشہرہ، مردان، صوابی، ہنگو اور کرم میں تیز ہواؤں، گرج چمک اور موسلادھار بارشوں کا امکان ہے۔ پی ڈی ایم اے نے خبردار کیا ہے کہ 22 سے 25 جولائی کے دوران گلیات، مانسہرہ، کوہستان، ایبٹ آباد، بونیر، چترال، دیر، سوات، شانگلہ، نوشہرہ، صوابی اور مردان کے مقامی اور برساتی ندی نالوں میں طغیانی کا خدشہ موجود ہے، جبکہ پہاڑی علاقوں میں لینڈ سلائیڈنگ کے خطرات بھی بڑھ سکتے ہیں۔ اس صورتحال کے پیش نظر پی ڈی ایم اے نے ضلعی انتظامیہ کو پیشگی اقدامات اٹھانے، ریسکیو 1122 اور امدادی اداروں کو الرٹ رہنے اور تمام دستیاب وسائل کو بروئے کار لانے کی ہدایت جاری کر دی ہے۔ حساس مقامات اور مرکزی شاہراہوں پر ٹریفک کی روانی برقرار رکھنے کے لیے بھی انتظامات کی تاکید کی گئی ہے۔ پی ڈی ایم اے نے ندی نالوں اور ڈرینج سسٹمز کی صفائی یقینی بنانے کی ہدایت کی ہے تاکہ ممکنہ اربن فلڈنگ سے بچا جا سکے۔ کسانوں کو فصلیں جلد کاٹنے اور محفوظ مقامات پر ذخیرہ کرنے جبکہ مویشی پال حضرات کو جانوروں کے تحفظ کے لیے اقدامات کی ہدایت کی گئی ہے۔ عوام کو تاکید کی گئی ہے کہ آندھی، ژالہ باری اور گرج چمک کے دوران کھلے میدانوں یا درختوں کے نیچے پناہ نہ لیں بلکہ محفوظ جگہوں پر منتقل ہو جائیں۔ مسافروں کو قومی و صوبائی شاہراہوں پر محتاط رہنے اور متبادل راستے اختیار کرنے کا مشورہ دیا گیا ہے۔ پی ڈی ایم اے نے تمام متعلقہ اداروں کو ہدایت کی ہے کہ موسمی الرٹس کو مقامی زبانوں میں عوام تک پہنچایا جائے اور ایمرجنسی صورتحال میں متبادل راستوں کو فعال رکھا جائے۔ پی ڈی ایم اے کا ایمرجنسی آپریشن سنٹر مکمل طور پر فعال ہے اور کسی بھی ناخوشگوار واقعے کی صورت میں عوام 1700 پر فوری اطلاع دیں۔
یہ بھی پڑھیں: تین دن شدید ہیٹ ویو کے بعد محکمہ موسمیات کی جانب سے اچھی خبر
