خیبرپختونخوا میں تیز آندھی اور بارشوں کی پیشگوئی، پی ڈی ایم اے نے الرٹ جاری کردیا

پی ڈی ایم اے نے صوبہ خیبرپختونخوا کے بیشتر اضلاع میں کل سے تیز آندھی، جھکڑ اور گرج چمک کے ساتھ بارش کا امکان ہے.

پی ڈی ایم اے نے پیشگوئی کی ہے کہ پری مون سون بارشوں کا یہ سلسلہ پیر کے روز تک وقفے وقفے سے جاری رہے گا۔ اس دوران چترال، اپر و لوئر دیر، سوات، کوہستان، شانگلہ، بٹگرام، مانسہرہ، ایبٹ آباد، ہری پور، مالاکنڈ، بونیر، کولائی پالس، تور غر، باجوڑ، مہمند، خیبر، اورکزئی، کرم، وزیرستان، پشاور، چارسدہ، نوشہرہ، صوابی، بنوں، کرک کوہاٹ، ھنگو، لکی مروت، ڈی آئی خان، ٹانک، شمالی اور جنوبی وزیرستان میں گرج چمک کے ساتھ تیز آندھی بارش/ژالہ باری کا امکان ہے۔

تمام ضلعی انتظامیہ کو بارشوں باعث کسی بھی ناخوشگوار واقعے سے پیشگی نمٹنے کے لیے مراسلہ جاری کیا گیا ہے۔ کسی بھی نا خوشگوار واقعے سے پیشگی نمٹنے کے لئے ضلعی انتظامیہ کو چھوٹی بڑی مشینری کی دستیابی یقینی بنانے کی بھی ہدایت کی گئی ہے۔ بارش کے دوران عوام بجلی کی تاروں، بوسیدہ عمارتوں و تعمیرات، سایئن بورڈز اور بل بورڈز سے دور رہنے کی ہدایات دی گئی ہیں۔ کسان حضرات کو تجویز دی گئی ہے کہ موسمیاتی پیش گوئی کو مد نظر رکھتے ہوئے اپنے معمولات ترتیب دیں۔

پی ڈی ایم اے نے سیاحوں اور مقامی آبادی کو حساس بالائی علاقوں میں موسمی حالات سے باخبر رہنے کے لیے احتیاتی تدابیر اپنانے کی ہدایت کی ہے۔ حساس اضلاع میں ضلعی انتظامیہ کو مقامی آبادی تک پیغامات مقامی زبانوں میں پہنچانے کا حکم دیا گیا ہے۔ کسی بھی ہنگامی صورتحال میں تمام متعلقہ ادارے روڈ لنکس کی بحالی میں چوکس رہیں اور سڑک کی بندش کی صورت میں ٹریفک کے لئے متبادل راستے فراہم کریں۔

سیاحوں کو خاص ہدایات دی گئی ہیں جس کے مطابق سیاح موسمی صورتحال اور سڑکوں کی بندش کے پیش نظر سیاحتی مقامات کا رخ کرنے سے پہلے پی ڈی ایم اے کی ہیلپ لائن پر ضرور رابطہ کریں۔ پی ڈی ایم اے کا ایمرجنسی آپریشن سنٹر مکمل طور پر فعال ہے عوام کو کسی بھی ہنگامی صورت میں رابطہ کرنے کی ہدایت دی گئی ہے۔

یہ بھی پڑھیں: پاکستان میں ہیٹ ویو کا سلسلہ کب تک جاری رہے گا؟ محکمہ موسمیات نے وارننگ جاری کردی