تین دن شدید ہیٹ ویو کے بعد محکمہ موسمیات کی جانب سے اچھی خبر
خیبرپختونخوا میں گرج چمک کے ساتھ بارش کا امکان، صوبے کے متعدد اضلاع میں پیر تک موسم خراب رہنے کا اندیشہ
صوبہ خیبرپختونخوا کے بیشتر اضلاع میں 12 جون سے گرج چمک اور آندھی کے ساتھ بارش کا امکان ہے۔ پی ڈی ایم اے کے مطابق، یہ بارشیں وقفے وقفے سے پیر تک جاری رہ سکتی ہیں۔ چترال، دیر، سوات، کوہستان، شانگلہ، بٹگرام، مانسہرہ، ایبٹ آباد، ہری پور، مالاکنڈ، بونیر، باجوڑ، مہمند، خیبر، اورکزئی، کرم، وزیرستان، پشاور، چارسدہ، نوشہرہ، صوابی، بنوں، کرک اور کوہاٹ میں گرج چمک کے ساتھ بارش یا ژالہ باری ہو سکتی ہے۔
پی ڈی ایم اے نے تمام ضلعی انتظامیہ کو ہدایت کی ہے کہ وہ بارشوں سے ممکنہ نقصان سے نمٹنے کے لیے پہلے سے تیاری کریں۔ چھوٹی بڑی مشینری کی دستیابی یقینی بنائی جائے تاکہ کسی بھی ہنگامی صورتحال پر فوری اقدامات کیے جا سکیں۔ عوام کو بجلی کی تاروں، بوسیدہ عمارتوں، سائن بورڈز اور بل بورڈز سے دور رہنے کی ہدایت کی گئی ہے۔
کسانوں کو مشورہ دیا گیا ہے کہ وہ موسمی پیشگوئی کو مدنظر رکھتے ہوئے اپنے کاموں کا انتظام کریں۔ سیاحوں اور بالائی علاقوں کی مقامی آبادی کو موسمی حالات سے آگاہ رہنے اور احتیاطی تدابیر اپنانے کی تاکید کی گئی ہے۔ ضلعی انتظامیہ کو ہدایت ہے کہ وہ حساس اضلاع میں مقامی زبانوں میں لوگوں کو موسمی انتباہات سے آگاہ کریں۔
سڑکوں کی بندش کی صورت میں ٹریفک کے لیے متبادل راستے فراہم کرنے اور روڈ لنکس کی بحالی پر توجہ دینے کی ہدایت کی گئی ہے۔ سیاحوں کو مشورہ دیا گیا ہے کہ وہ سیاحتی مقامات کا رخ کرنے سے پہلے پی ڈی ایم اے کی ہیلپ لائن پر رابطہ کریں۔ پی ڈی ایم اے کا ایمرجنسی آپریشن سنٹر مکمل طور پر فعال ہے اور کسی بھی ہنگامی صورتحال میں فوری مدد کے لیے تیار ہے۔
یہ بھی پڑھیں: پاکستان میں ہیٹ ویو کا سلسلہ کب تک جاری رہے گا؟ محکمہ موسمیات نے وارننگ جاری کردی
